सगळीकडे अंधार काळोख पसरलेला
चंद्रप्रकाशही काळ्या ढगात गोठलेला
वाटे तारकाअक्षरे रेखावी नभपटावर
पण नभपटही काळ्या रात्रीने झाकलेला

सप्तरंग ल्यालेली फ़ुलेही मिटलेली
सतेज हिरवी पाने खोडावर टेकलेली
वाटे चहुबाजुंनी रंगांची उधळण व्हावी
पण प्रत्येक रंगही पूर्ण फ़ुलत लपलेला

खळाळत्या झऱ्याचा काहिसा आवाज थांबलेला
काठावरी जरासा पांथस्थ विसावलेला
वाटे जलतुषारांनी आसमंत चिबं भिजावा
पण थेंबही हळुवार झऱ्यासह चाललेला

साऱ्या स्रुष्टिसमवेत हे शरीरही निजलेले
सर्व जाणिवांच्या पलिकडे पोचलेले
वाटे जगत्या मनास निद्रिस्त जाग्रुत करावे
पण निमिषाने जाग्रुतिसाठी रविकिरण आसुसलेला