कुठून कशी येईल लहर
कोण जाणे
तिचा पत्ता विचारायचं धाडस माझ्यात नाही
तिच्या राज्यात मीच सामान्य नागरिक म्हणून रहाते
सगळे कर नियमित भरते
तरी ही असंतुष्टच
असं एखाद दुसऱ्या घोटाने 
हीची तहान भागत नाही
हिची धाव कायम सागराकडे
लाटांचं नर्तन नजरेस पडल्याशिवाय
हिचा अवखळपणा शांत होत नाही
मग ती हेलकावत रहाते किनाराभर
जगणं कोळून प्यायलेल्या प्रौढे सारखी
प्रगल्भ

----- वैभवी भिडे

4 July 2014