तुझ्या गावात त्या नंतरही मी कित्येकदा आले 
स्वागताचे भव्य सोहळेही झाले 
पण त्यात ते दोन शब्दांचं गहिरेपण नव्हतं 
" स्वागत असो " 
आल्यावर माझे डोळे कायम भिरभिरत राहिले 
तू तिथे नाही हे माहित असूनही 
सवयीचा परिणाम 
खूप फिरले मी 
पण तुझ्या सोबत एक रस्ताही न बघू शकल्याचे शल्य मनात बाळगून 
आज पुन्हा येउन गेले तिथे 
स्वागताविनाच 
कारण आता मीही या " गावचीच " झालेय 
कधी समोर दिसलास तर मीही म्हणून जाईन नकळत 
" स्वागत असो "

----- वैभवी भिडे