माझ्या भात्यात आहेत कैक काटे 
काहींनी क्षण दुखावलेत 
काहींनी मान तर काहींनी स्वाभिमान 
काही जण इतके बेरकी की 
भावनांचे थर फाडून खोल घुसलेयत 
जन्मठेपेची शिक्षा असल्यासारखे 
तसे काही एकदम हलकेफुलके 
नुसते खरचटण्या पुरते 
काही तर मोडून पडले 
एक ओरखडा उमटवून 
काहींचा नुसताच खळखळाट 
कातरवेळी घालमेल वाढवत 
तरीही माझा " गुलाब " सुरक्षित आहे 
काट्यांच्या जागत्या पहाऱ्यात 
अधिकाधिक " टवटवीत " 

----- वैभवी भिडे