समुद्रात भरकटलेल्या जहाजाला
एखादं बेट सापडावं
तसेच पोहोचतात सारे
कवितांच्या प्रदेशात
फार भन्नाट असतात हे
कोरे करकरीत अनुभव

स्वागताला परिचित शब्द उभे दिसतात
वेस ओलांडली की ओळख होते
नव्यानेच जुन्या अर्थांशी

सापडत जातात नित्यनवी क्षितिजं
लेखणीच्या स्पर्शासाठी आसुसलेली
अचंभित नजरांनी आसपास बघावं
तर दिसतात आपल्याच सारखे कित्येकजण
वाट चुकलेले

चालता चालता अवचित गवसू शकतो
शब्दाजडीत महाल अर्थांनी लखलखणारा
एकएक अक्षर जणू कोहिनूर
कल्पनांच्या कोंदणात जडवलेला

भाषांची लयदार घोटीव शिल्पे
खुणावतात विचारांना
अन अलगद अडकतात अनुभव 
या कालप्रवाहात
पुन्हा पुन्हा जागृतीसाठी

संपता संपत नाही हा प्रदेश
निघता निघत नाही पाउलं
भागता भागात नाही तहान
अन सुरु रहातो अखंड यज्ञ
पिढ्यानपिढ्या
पंचतत्वात रुजलेला

---- वैभवी भिडे