कपाळा वरच्या गोंदणा प्रमाणे 
ठसून जातात सल हृदयात  
ठसठशीत ठळक                                                                           
मनाचे एक एक स्तर पार करत 
आत खोलवर दडून बसतात 
मौका साधून टोचणी द्यायला 

फार क्रूर असतात हे सल 
अफाट ताकदीचे 
एका क्षणात भूकंप आणतात 
ध्वस्त करतात मंदिर, मस्जिद, चर्च 
विना भेदभाव 

आरोग्यास अतिशय हानिकारक 
असाध्य रोगाहूनही भयानक 
आजवर औषधाचा शोध लागला नाही 
आणि भविष्यात लागण्याची चिन्हेही नाहीत 

दुर्मिळातील दुर्मिळ खटला 
फिर्यादी अन आरोपी आपलंच मन
निकाल मात्र अनिश्चित कालावधी साठी 
पुढे ढकलण्यात आलेला 

----- वैभवी भिडे